---------------
പൂവന്‍
പ്രഭാതത്തെ കൂവിയുണര്‍ത്തുന്നത്
പ്രതിഷേധത്തിന്റെ കരുത്തറിയിക്കാനാണ്
കൂടടച്ചു നീയോരുക്കിയ
തടങ്കല്‍ പാളയത്തോടുള്ള
അണപൊട്ടിയ രോഷത്തിന്റെ
തിളച്ചു മറിയുന്ന പടപ്പാട്ടാണത്
പൂവന്‍
പ്രഭാതത്തില്‍ വിളിച്ചുപറയുന്നത്‌
പ്രൌഡിയുടെ പൈതൃകവും
പുകള്‍പെറ്റ പൌരുഷവും മാത്രമല്ല
പ്രഭാതത്തിന്‍റെ വരവേല്‍പ്പും
പ്രതീക്ഷയുടെ പ്രവചനവും
പൂവന്‍റെ പ്രഭാത പ്രഭാഷണമാണ്‌
പൂവന്‍
ജീവിതത്തോട് കൂവിപ്പറയുന്നത്
വംശ വര്‍ധനവിന്റെ വേവലാതിയില്ലാതെ
വിളയാട്ടത്തിന്‍റെ ആത്മ സുഖമാണ്
ഒഴിഞ്ഞ വയറോടെ വന്ന്
നിറഞ്ഞ വയറിന്‍റെ തൃപ്തിയില്‍
ഇണയെ വട്ടം ചുറ്റി വലവീശുന്ന
കരുത്തിന്‍റെ കൌശലമാണത്
പൂവന്‍
ജീവിതത്തിന്‍റെ കൂവലടക്കുന്നത്
ആര്‍ത്തിയുടെ കത്തിക്ക് മുന്നില്‍
നിന്റെ അതിരില്ലാത്ത ആസക്തിയുടെ
നശ്വരത ഓര്‍മിപ്പിച്ചു കൊണ്ടാണ്
നാഥനില്ലാ പിടകളുടെ
പ്രതിഷേധമില്ലാത്ത ജീവിതത്തെ
പൂവനോ പിടയോ ലാഭമെന്ന്
ഹരിച്ചും ഗുണിച്ചും കണക്കു കൂട്ടുന്ന
നിന്റെ ഇഴ യുടഞ്ഞ ജീവിതവുമായി
ഇഴചേര്‍ത്തു കൊണ്ടാണ്.......
